ABC News​ нашри ўтказган умумамерика сўровномаси хизмат вазифасининг дастлабки олти ойида президент Трампнинг мавқейи тарихий антирекордни қайд этганини кўрсатди.

10-13 июль кунлари бўлиб ўтган умумамерика сўровномасида қатнашган 1 001 нафар катта ёшдаги фуқаролар Оқ уй раҳбарининг 6 ойлик фаолиятига баҳо берганлар.

Сўровнома натижаларига кўра, америкаликларнинг атиги 36 фоизи амалдаги президентни қўллаб-қувватламоқда. Бу мазкур сўровнома ўтказила бошланган 1945 йилдан бери энг паст кўрсаткич ҳисобланади. Солиштириш учун, Барак Обаманинг дастлабки 6 ойдаги рейтинги 59 фоизни ташкил этган эди.

Америка аҳолисининг 58 фоизи Доналд Трампдан норозилигини изҳор этган. Бу ҳам АҚШ президентлари орасидаги энг ёмон кўрсаткич ҳисобланади. Бунгача энг паст рейтинг Билл Клинтонга тегишли бўлиб турган эди.

АҚШ аҳолисининг 48 фоизи мамлакатнинг дунёдаги етакчилиги олдингидан кўра пастроқ, деб ҳисоблашини маълум қилган. Шунингдек, қатнашчиларнинг 63 фоизи ўтган йили Доналд Трампнинг ўғли ва куёвининг россиялик юрист билан учрашувини нотўғри деб ўйлашини айтган.

Эслатиб ўтамиз, президентлигининг дасталбки 100 куни бўйича ўтказилган сўровномада Трампнинг кўрсаткичлари нисбатан яхшироқ бўлган эди. Жумладан, аввалги рейтингда 42 фоиз америкаликлар Трампни қўллашини билдирган эди.