Россия Федерацияси президенти Владимир Путин «Россия 1» телеканалига берган интервьюсида АҚШнинг жорий қилган янги санкцияларга Россия қандай жавоб қайтаришига ойдинлик киритди, дея хабар бермоқда Russian Today телеканали.

Якшанба куни эфирга узатилган суҳбатда президент Путин Оқ уйни АҚШ-Россия муносабатларини ёмонлаштиришда айблаган. Унинг фикрича, АҚШ ҳукуматининг Россияга қарши янги чекловлари ноқонуний бўлиб, улар Россия билан алоқаларни ривожлантириш ва сақлаб қолишдан манфаатдор бўлган, дунёнинг бошқа мамлакатларига таъсир ўтказишга уринишдан бошқа нарса эмас.

Ўтган ҳафтада АҚШ Конгресси Россия, Эрон ва Шимолий Кореяга қарши янги санкцияларни тасдиқлаган эди. Бунга жавобан, Россия ташқи ишлар вазирлиги жавоб санкцияларини эълон қилган. Унга кўра, Россияда америкалик дипломатлар сони АҚШда рус дипломатлари сонига мутаносиб тарзда қисқартирилиши лозим.

Вазирликнинг маълум қилишича, 1 сентябрга қадар Россияда фаолият олиб борадиган америкалик дипломатлар 455 нафаргача камайтирилиши белгиланган. Айни пайтда Россиядаги АҚШ дипломатик миссияси вакиллaри сони 1 200 нафардан ортади.

АҚШ давлат департаменти Кремл қароридан таассуфини изҳор қилган. Давлат департаменти Россиядаги ходимлари сони ҳақида маълумот бермаган бўлса-да, қисқартириш оқибатлари ва Россияга қайтарилажак жавоб масаласи ўрганилаётганини маълум қилган.