Бразилия президенти Мишел Темерни муддатидан аввал импичмент билан ваколатидан маҳрум қилиш ҳаракати амалга ошмай қолди, дея хабар бермоқда Associated Press​ агентлиги.

Мамлакат парламентида кеча Мишел Темерни истеъфога чиқариш бўйича овоз берилди. Конгресснинг 513 нафар аъзоларидан учдан икки қисмидан кўпроғи унга қарши овоз берган тақдирда президент вазифасидан озод қилиниши лозим эди.

Лавозимини сақлаб қолиш учун Темер 171 овоз олиши кифоя эди. Якунда Конгресс йиғилишида иштирок этган депутатларнинг 263 нафари президент ўз ўрнида қолишини ёқлаб овоз берган. 227 киши эса уни истеъфога чиқариш ташаббусини ёқлаган.

Бразилияда президент Темерга қарши мамлакат бош прокурори Родриго Жанот коррупсияга оид жиноий иш очган. Аммо президентнинг жавобгарликдан дахлсизлик ҳуқуқига эга. Президентнинг бу ғалабадан ҳозирча хурсанд бўлишга ҳали эрта. Ой охирига қадар бош прокурор унга қарши иш очиш масаласини кўтариши кутилмоқда.

Мишел Темер аввалги президент Дилма Руссеф даврида вице-президент лавозимида ишлаган. Дилма Руссеф 2016 йилда коррупциявий айбловлар билан истеъфога чиқарилган. Темерга қўйилаётган айбловлар унинг вице-президентлик вақтида тадбиркорлардан пора олгани билан боғлиқ.