Эрон Ислом Республикаси президентлигига иккинчи муддатга сайланган Ҳасан Руҳоний янги ваколат муддатига киришди. "Ал Жазира" телеканали хабар беришича, Эрон раҳбарининг қасамёд маросими бугун бўлиб ўтган.

Ҳасан Руҳоний Эроннинг сиёсий ва ҳарбий раҳбарлари иштирок этган маросимда сўзлаган нутқида АҚШ томонидан Эронга қарши ўрнатилган иқтисодий санкциялардан норозилигини изҳор қилган ҳамда иқтисодий қамални тугатишга ваъда берган.

«Иқтисодий қамални ҳеч қачон қабул қилмаймиз. 2015 йилда эришилган ядровий битим Эроннинг халқаро майдонда самимийлигининг белгисидир. Қамалга чек қўямиз», – деб айтган президент Руҳоний ўз нутқида.

2015 йилда Россия, Британия, Франция, Хитой, Германия ва АҚШ Эрон билан ядровий келишувга эришишида Руҳонийнинг ўрни катта бўлган. Келишув туфайли Эронга қарши санкцияларнинг бир қисми бекор қилинган. Аммо АҚШнинг янги президенти Доналд Трамп мазкур битимни бекор қилишни истамоқда.

Ҳасан Руҳонийнинг қасамёдидан бир кун аввал Трамп Эронга қарши янги санкциялар жорий қилиш ҳақидаги қонунни имзолаган. Ҳасан Руҳоний президентлигининг илк давридан бери Ғарб билан алоқаларини яхшилашга уриниб келгани учун мухолифларининг танқидига дучор бўлган эди.

Эрон раҳбари мамлакат аҳолисини бирлашишга чақирган ва Эронни буюк давлатга айлантириш истагида бўлган барча эронликларга қучоқ очишини эълон қилган.