Европа Иттифоқини тарк этиш ҳаракатига тушган Буюк Британия иттифоқ талаб қилаётган маблағни эркин савдо бўйича келишувга эришилган тақдирда тўлаш истагини билдирмоқда, деб ёзади Telegraph​ нашри.

“Европа Иттифоқи биздан 60 миллиард евро олишни истаётганидан хабардормиз. Улар талаб қилаётган маблағнинг энг паст чегараси эса 50 миллиард еврога тенг. Биз 30 миллиардни мўлжаллаяпмиз. Аммо 40 миллиард еврога ҳам рози бўлишимиз мумкин. Ҳозирча жамоатчилик ва сиёсатчилар бир тўхтамга келишмаган”, – деб айтган ҳукуматнинг исми эълон қилинмаган вакили.

Ҳукуматдаги бошқа бир манбага кўра, Британия 30-40 миллиард евро тўлашни режалаштирмоқда. Нашрнинг учинчи манбаси эса Тереза Мей 30 миллиард еврони мўлжаллаётганини айтган. Telegraph нашри ёзишича, Тереза Мей ҳукуматида Евроиттифоққа тўланадиган товон борасида якдиллик йўқ.

Брексит тарафдорлари бундай катта суммани тўлаш шартини қабул қилиш қийинлиги ҳақида ўйлашмоқда. Британияликлар шундай катта тўлов эвазига иттифоқ билан иқтисодий ҳамкорликни сақлаб қолишга уринади. Август ойи сўнгида Евроиттифоқ ва Буюк Британия ўртасида ажралиш бўйича музокаралар бошланиши кутилмоқда.Британия мазкур музокаралардан кўп нарса умид қилмаяпти.

Аввалроқ Брюсселдагилар Лондондан 60 миллиард евро талаб қилаётгани ҳақида хабарлар тарқалган, аммо Британия бу маълумотни тасдиқламаган эди. Ҳозирча ҳукумат ажралиш бадалини йилига 10 миллиард евродан уч йилда тўлашга розилиги борасида маълумотлар бор.

Товон пули иттифоқ ва Британия ўртасида эркин савдо шартномаси амалга ошган тақдирда тўланиши кўзда тутилган. Британиянинг таклифи инглиз делегациясининг Брюсселга ташрифи вақтида эълон қилиниши кутилмоқда.

Ҳозиргача ўтказилган музокаралар Британиайдаги Евроиттифоқ фуқаролари ва иттифоқдаги британияликлар ҳуқуқлари, Бирлашган Қиролликнинг божхона иттифоқи ва умумий бозор билан муносабатлари каби масалалар бўйича олиб борилган. Маълумот учун, Буюк Британия 2019 йилнинг март ойида иттифоқни бутунлай тарк этиши кутилмоқда.