Владимир Путин ташқи ишлар вазири ўринбосари Анатолий Антоновни Россия Федерациясининг АҚШдаги элчиси этиб тайинлаш ҳақидаги фармонни имзолади. Бу ҳақида ТАСС агентлиги хабар бермоқда.
2008 йилдан бери АҚШда Россия манфаатларини ҳимоя қилиб келган Сергей Кисляк президент фармони билан ишдан олинган. Сергей Кисляк 2016 йилги АҚШ президенти сайловларига аралашишда гумон қилинаётган эди. Федерал қидирув бюроси Россия элчиси билан АҚШ президентининг ўғли ва куёви ўртасидаги алоқаларни тафтиш қилаётган эди.
Бу лавозимга янги тайинланган Анатолий Антонов 2015 йилда Европа Иттифоқининг «қора рўйхат»ига киритилган россиялик дипломатлардан ҳисобланади. Антоновга нисбатан санкция Қримнинг Россия таркибига қўшиб олиниши туфайли содир бўлган. Ўша вақтда Антонов Россия мудофаа вазирининг ўринбосари лавозимида ишлар эди.
1955 йилда туғилган Анатолий Антонов Москвадаги Халқаро алоқалар институтини тамомлаган. 2004 2011 йилларда Ташқи ишлар вазирлигининг хавфсизлик ва қуролларни камайтириш масалалари бошқарамси бошлиғи вазифасини бажарган. Антонов АҚШ билан қуролларни қисқартириш бўйича музокараларда рус делгациясига раҳбарлик қилган.
Анатолий Антонов 2016 йилнинг декабрь ойидан бери ташқи ишлар вазири ўринбосари лавозимида ишлаб келаётган эди. Қайд этиш жоиз, янги элчи икки мамлакат муносабатлари совуқлашган бир вазиятда лавозимга тайинланмоқда. Эслатиб ўтамиз, кеча Масквадаги АҚШ элчихонаси россиялик сайёҳларга виза бериш тўхтатилишини эълон қилган эди.