Тошкент халқаро аэропортида икки нафар фуқаро — Ш.Маматсоева ва А.Умаров 1000 дан зиёд қутидаги тамаки маҳсулотларини нон ичига яшириб, Туркия давлатига ноқонуний олиб ўтмоқчи бўлганликлари фош бўлди.
“Тошкент-Аэро” ИБК Ахборот хизмати хабар беришича, фуқароларнинг багажлари Истанбулга парвоз олдидан божхона кўригидан ўтказилганда улар 2 турдаги тамаки маҳсулотларини нонлар орасига бекитишгани аниқланди. Шунингдек, уддабуронлар сигаретларни картон қутилардаги печеньелар орасига ҳамда пойафзаллар ичига ҳам яширишган экан.
© Фото: customs.uz
Шу тариқа, божхона ходимларининг оғзаки сўрови пайтида маълум қилмасдан туриб ҳамда йўловчи божхона декларациясида қайд этмасдан Ш.Маматсаева 560 қути, А.Умаров эса 500 қути тамаки маҳсулотларини яширинча олиб чиқишга уринишган пайтда тўхтатиб қолинди.
Ҳозирда ушбу ҳолатлар юзасидан божхона текширувлари ва суриштирув жараёнлари давом эттирилмоқда.