Саудия Арабистони бошчилигидаги араб коалицияси қўмондонлиги 25 август куни Яман пойтахти Сана шаҳридаги аҳоли уйларига берилган ҳаво зарбаси бўйича баёнот берди. Саудия матбуот агентлиги коалиция матбуот котиби полковник Туркий ал-Маликийга таяниб хабар беришича, аҳоли иншоотига ҳаводан зарба берилишига «техник хатолик» сабаб бўлган.

Коалиция баёнотида Ямандаги ҳусий исёнчилари тинч аҳолидан тирик қалқон сифатида фойдаланишда айбланган. Полковник Маликийнинг айтишича, ҳаво ҳужумида аҳоли истиқомат қиладиган бино атайин нишонга олинмаган бўлиб, техник хато туфайли тинч аҳоли жабр кўрган. Коалиция вакили ҳужум туфайли жабр кўрганларга ва ҳалок бўлганларнинг яқинларига «чуқур ҳамдардлик» изҳор қилган.

Баёнотга кўра, коалиция юз берган фожиа бўйича тафтиш ўтказган. Қайд этилишича, коалициянинг нишони ҳусий исёнчилари қўмондонлик маркази эканлиги тахмин қилинган ҳарбий иншоот бўлган. Айни пайтда, ҳусий исёнчилари ҳарбий объектларни аҳоли истиқомат қиладиган ҳудудларга жойлаштиргани учун айбдор қилинган.

Эслатиб ўтамиз, ўтган ҳафтанинг жума куни Сана жанубидаги Фаж Аттан мавзесида аҳоли истиқомат қиладиган иккита бинога ҳаво зарбаси берилган эди. Ҳужум оқибатида камида 14 киши ҳаёт кўз юмган бўлиб, улар орасида болалар ҳам борлиги қайд этилган. Мазкур ҳужумдан икки кун аввал Сана яқинидаги меҳмонхонага коалиция томонидан ракета зарбаси берилган эди.