Фарғона вилоятининг Ўзбекистон туманида бўлган мухбиримиз одатда йўл қурувчиларнинг назарига тушмай ўйдим-чуқур бўлиб ётадиган қишлоқ кўчаси ғалати таркибли модда билан ямалганининг гувоҳи бўлди, деб ёзмоқда Carzone. Айтиш керакки, ямоқ сифатида қўлланган номаълум таркибли модда силлиқ, асфалтга яхши ёпишган ҳамда йўлнинг асл қопламасидан кўп ҳам фарқ қилмайди.

Суриштиришлар натижасида маҳаллий аҳоли пахта заводида чиқариб ташланган аралаш чиқиндини йўл қопламаси сифатида ишлатаётгани маълум бўлди. Ундан кунжара ҳиди анқийди, таркибида мой туфайли силлиқ ва ёпишқоқдир. У асфалтга қараганда бир оз юмшоқроқ бўлиб, қаттиқ босим таъсирида сийқаланиб, эзилиб кетади.