Хитойда БРИКС саммити ўз ишини бошлади

04.09.2017 | Жаҳон | 2431

4 сентябрда Хитойнинг Сямэнь шаҳрида БРИКС саммити бошланди. Анжуман меҳмонларини шахсан Хитой раиси Си Цзиньпин кутиб олди. Дастлаб Россия, Бразилия, Ҳиндистон, Хитой ва ЖАР етакчилари биргаликда суратга тушиш маросимида иштирок этишди. Шундан сўнг биринчи ялпи масжлис бошланди.

Хитой раҳбари Си Цзиньпин давлат етакчиларини Сямэнь халқаро анжуманлар марказида кутиб олди ва бу ерда миллий байроқлар фонида биргаликда суратга тушилди.

Шундан сўнг Си Цзиньпин, Владимир Путин (Россия), Мишель Темер (Бразилия), Нарендра Моди (Ҳиндистон) ва Жейкоб Зума (ЖАР) жаҳон иқтисодиёти, глобал бошқарув, халқаро ва минтақавий можароларни муҳокама қилди.

Бу йил тузилмада раислик қилувчи Хитой мазкур саммитнинг асосий йўналишлари сифатида тинчлик-барқарорликни таъминлаш мақсадида ўзаро манфаатли ва кенг қамровли шерикликни кучайтириш ва глобал бошқарув тизимини яхшилашни белгилаб олди.

5 сентябрь куни ниҳоясига етадиган саммит якунлари бўйича қўшма Сямэнь декларацияси имзоланиши кутилмоқда.

БРИКС гуруҳи 2006 йил июнда Петербург халқаро иқтисодий анжумани вақтида тузилган. Ўшанда унга Бразилия, Россия, Ҳиндистон ва Хитой кирган. Гуруҳнинг биринчи саммити 2009 йилда ўтган. 2011 йил февралда гуруҳга Жанубий Африка Республикаси қўшилган.