Россияда футбол бўйича 2018 йилда бўлиб ўтадиган жаҳон чемпионати иншоотларининг аксарияти йил охирига қадар битказилиши кутилмоқда. Бу ҳақида Россия Федерацияси бош вазири ўринбосари Виталий Муткога асосланиб, Russian Today​ телеканали хабар бермоқда.

Бош вазири ўринбосарининг айтишича, мусобақани ўтказиш учун 180 та махсус иншоот қурилиши режалаштирилган бўлиб, ҳозирга қадар қурилиш ишларининг 80 фоизи ниҳоясига етган. Жаҳон чемпионати ўйинлари Россиянинг 11 та шаҳридаги 12 та стадионда ўтказилади. Яқинда ўтказилган Конфедерациялар кубоги баҳсларига Қозон, Санкт-Петербург, Сочи ва Москва шаҳарлари мезбонлик қилган.

Булардан ташқари, Екатеринбург, Ростов-Дон, Волгоград, Самара, Нижний Новгород, Саранск ва Калининград шаҳарларида ҳам жаҳон чемпионати учрашувлари ўтказилиши кўзда тутилган. Фақатгина пойтахт Москва шаҳрида иккита ўйингоҳ – Лужники ва Открытие Арена стадионлари баҳсларга мезбонлик қилади.

«Жаҳон чемпионатига қандай тайёргарлик кўрилаётганини ҳамма кўриб турибди. Катта ҳажмдаги ишлар амалга оширилмоқда. Шаҳарлар янги қиёфага кирмоқда, ҳудудларга жаҳон чемпионатидан улкан мерос қолади: аэропортлар,йўллар, инфратузилма, меҳмонхоналар, стадионлар ва машғулот майдонлари бўлади», – деб айтган Мутко журналистлар билан суҳбатда.

Бош вазир ўринбосари иншоотларнинг аксариятини йил охиригача битказишга ваъда берган. Аввалроқ Самара шаҳридаги Самара Арена стадиони қурилиши режадан бир ой ортда қолаётгани ҳақида хабарлар тарқалган эди. Аммо сешанба куни маҳаллий ташкилий қўмита вакили Алексей Сорокин 45 минг ўринли стадион қурилиши янги йилга қадар тугатилишини маълум қилган.

Эслатиб ўтамиз, келаси йилнинг 14 июньдан 15 июльигача Россия футбол бўйича жаҳон чемпионатига мезбонлик қилади. Ҳозирча мусобақада иштирок этадиган 32 жамоадан 8 тасининг номи аниқ бўлди. Ўзбекистон терма жамоаси кеча саралаш босқичининг сўнгги турида Жанубий Корея термаси билан 0-0 ҳисобида дуранг ўйнади.

Гуруҳдан Эрон ва Жанубий Корея жамоалари тўғридан-тўғри йўлланмани қўлга киритган бўлса, учинчи ўринни олган Сурия терма жамоаси ўтиш ўйинида Австралияга қарши ўйнайди. Сурия билан бир хил очко жамғарган Ўзбекистон терма жамоаси эса тўртинчи ўринни эгаллади ва жаҳон чемпионатида қатнашиш имкониятини қўлдан бой берди.