Левада тадқиқот маркази томонидан ўтказилган сўнгги сўровнома Суриядаги урушда Россиянинг иштирокига фуқароларнинг муносабати салбий томонга ўзгарганини кўрсатган. Бу ҳақида Russian Today телеканали хабар бермоқда.
Август ойида ўтказилган тадқиқот натижаларига кўра, Россия аҳолисининг қарийб ярми Россия ҳарбий-ҳаво кучларининг Суриядаги фаолияти тўхтатилишини истайди. Сўровномада иштирок этганларнинг 49 фоизи Суриядаги фуқаролар урушига Россиянинг аралашувидан норозилигини билдирган.
Иштирокчиларнинг атига 30 фоизи Россия авиациясининг Суриядаги бомбардимонларини қўллаб-қувватлашини айтган бўлса, 22 фоиз аҳоли бу масалада аниқ фикрга эга эмаслигини маълум қилган. Таққослаш учун, ўтган йилнинг октябр ойида ўтказилган сўровномада аҳолининг 52 фоизи Путиннинг Суриядаги сиёсатини қўллаб-қувватлаши аниқланган эди. Ўшанда иштирокчиларнинг атиги 26 фоизи Россия ҳукуматининг Башар Асад армиясига кўрсатаётган ёрдамидан норози эканлигини билдирган эди.
Бу йилги тадқиқотда иштирокчилардан Суриядаги вазиятни қай даражада кузатиб бораётганликлари ҳам сўралган. Маълум бўлишича, Россия аҳолисининг 18 фоизи Суриядаги воқеаларни диққат билан кузатса, 56 фоиз фуқаролар умумий вазиятдан хабардор, аммо ҳодисаларни батафсил ўрганишга уринмайди. Қолган 26 фоиз аҳоли эса Суриядаги вазиятга қизиқиш билдирмаслигини маълум қилган. Бундан ташқари, сўровнома россияликларнинг 32 фоизи Суриядаги уруш Россия учун иккинчи Афғонистон бўлиши мумкинлигидан хавфсирашини ҳам аниқлаган.
Кўрсаткичлар Россия аҳолисининг Суриядаги ҳарбий ҳаракатларга муносабати тобора салбий томонга ўсиб бораётганини Россия қўшинлари Сурияга кирган 2015 йилда уни қўллаб-қувватловчилар 70 фоизни ташкил қилганидан ҳам кўриш мумкин.
Маълумот учун, Россия самолётлари 2015 йилнинг 30 сентябрида Сурияда исёнчиларни бомбардимон қилишни бошлаган. 2016 йил мартида Путин Суриядаги қўшинларнинг бир қисмини ортга қайтаришга буйруқ берган эди. Россия авиацияси Сурия ҳарбийлари билан бирга ИШИД жангарилари ва бошқа исёнчи гуруҳларга қарши курашни давом эттирмоқда.