Ўзбекистонлик шифокорлар Владимирдаги автоҳалокатдан жароҳатланганларни муолажа қилишни бошлаб юборди (фото)

07.10.2017 | Ўзбекистон | 3424

Ўзбекистон ФВВ ва ССВ ходимларидан иборат тезкор гуруҳ 6 октябрь куни Россиянинг Владимир вилояти Покров туманида содир бўлган йўл-транспорт ҳодисасида жабрланган ўзбекистонликларга тиббий ва психологик ёрдам кўрсатиб, муолажа ишларини бошлаб юборган. Бу ҳақда «Ўзбекистон 24» хабар берди.

Ҳозирда жароҳатланганлардан 3 нафарининг аҳволи оғир. Булардан бири ёш бола. Олдинроқ Ўзбекистон ТИВ Миржон Латипов (1974 йилда туғилган), Тўлқин Тожиев (1976) ва Гулрух Зиёдуллаева (2012) оғир аҳволда шифохонада даволанаётганини хабар қилганди.

«Ўзбекистон 24» канали 37 нафар ўзбекистонликнинг аҳволи яхши эканлигини хабар қилмоқда.

Покров шаҳри маъмурияти биносида штаб тузилган бўлиб, расмий вакиллар жабрланганларни тезроқ Ўзбекистонга қайтариш бўйича чораларни кўрмоқда.

Олдинроқ, Россия ФВВ маълумотида автобусда 58 киши бўлиб, улардан 2 нафар ҳайдовчи Қозоғистон фуқароси, қолган 56 киши Ўзбекистон фуқароси эканлиги айтилганди.