Доналд Трамп сенатор Боб Коркернинг учинчи жаҳон уруши ҳақидаги сўзларига муносабат билдирди. Якшанба куни New York Timesнашрига интервью берган Республикачилар партияси вакили Оқ уй раҳбарини президентлик ишига телешоу каби муносабатда бўлишда айблаган эди.
Америкалик сиёсатчи бир вақтлар Доналд Трамп билан яқин муносабатларга эга бўлган. 2016 йилги сайловолди кампания вақтида Коркер Доналд Трампнинг миллий хавфсизлик масалалари бўйича маслаҳатчиси бўлган. Ўша вақтда у вице-президент ва давлат котиби лавозимларига асосий даъвогарлардан бири эди.
Аммо Трамп ва Коркер муносабатлари бузилиб, орага совуқчилик тушди. АҚШ президенти муҳим лавозимдаги сенатор номига номуносиб сўзларни йўллашдан ҳам тап тортмади. Боб Коркер Сенатнинг халқаро алоқалар қўмитаси раҳбари ҳисобланади. Айни вақтда, Коркер ҳам президентни танқид қилишда давом этди.
Доналд Трамп Коркерни Эрон билан тузилган ядровий битим учун айблаган бўлса, сенатор Шарлотсвиллдаги ирқчилар юзага келтирган фожиага муносабати учун президентни аёвсиз танқид қилди. Боб Коркер президентни Шимолий Корея ва Эронга нисбатан сиёсатини қоралаган ва мамлакатни муқаррар урушдан давлат котиби Рекс Тиллерсон, мудофаа котиби Жим Маттис ва Оқ уй ходимлар штаби раҳбари Жон Келли асраб қола олишини айтган эди.
Президент Доналд Трампда ҳам ўзини ҳимоя қилишни кечиктирмайдиган кишилар сирасидан. Президент ўзининг Твиттердаги саҳифасида Коркер ундан сенаторликка қайта сайланишни «ўтиниб сўрагани», давлат котиби лавозимини беришини «илтимос қилгани», аммо президент унинг истакларини рад этгани, шу туфайли Коркернинг унда алами борлиги ҳақида ёзган.