ОАВ: ИШИД пойтахти жангарилардан озод қилинди

14.10.2017 | Жаҳон | 2583

Суриянинг ИШИД томонидан эгаллаб олинган ва маъмурий марказ деб эълон қилинган Раққа шаҳри бутунлай эстремистлардан озод қилинди. Бу ҳақда Al Arabiya телеканали ўз манбаларига асосланган ҳолда хабар қилмоқда.

Телеканал билан суҳбатлашган манбанинг сўзларига кўра, шаҳарда қолган жангарилар «Сурия демократик кучлар» қуролланган коалицияси отрядларига таслим бўлган.

Бундан олдин Россия ҳарбий идоралари Сурия ҳудудининг 92 фоиздан ортиғи жангарилардан озод этилгани ҳақида хабар берган эди. Раққани озод қилиш бўйича ҳужум 6 июнда бошланган эди. СДКни ҳаводан АҚШ етакчилигидаги халқаро коалиция ҳарбий-ҳаво кучлари қўллаб-қувватлади. 

Ўша вақтда мутахассислар Сурия ва Ироқдаги амалга оширилган шу турдаги операциялардан келиб чиқиб, шаҳарни озод этилиш ишлари бир неча ой давом этишини маълум қилган эди.

Бироқ июль ойидаёқ АҚШ Раққанинг 30 фоизи ИШИД жангариларидан тозалангани ҳақида хабар берган эди.