Ўтган ҳафтада Испания бош вазири Мариано Рахой томонидан Каталонияга мустақиллик эълон қилинган ёки қилинмаганини аниқлаштириш бўйича берилган муҳлат ниҳоясига етди. Guradian​ нашри хабарига кўра, Каталония президенти Карлес Пуждемон Испания бош вазирига расмий жавоб хатини йўллаган.

Жавоб мактубида Каталония мустақиллиги эълон қилинган ёки қилинмагани масаласи очиқлигича қолган. Карлес Пуждемон Испания ҳукуматининг сўровига аниқ жавоб қайтариш ўрнига Мариано Рахойни мустақиллик бўйича музокаралар ўтказишга чақирган. Унинг музокара ўтказишга чорлови ўтган сешанба куни Каталония Мустақиллик декларацияси имзоланган куни ҳам янграган эди.

Каталония парламентида чиқиш қилган Карлес Пуждемон мустақилликни расман эълон қилишга шошилмасликни маъқул кўрган эди. Испания ҳукумати эса Каталония ҳукуматидан вазиятни аниқлаштиришни талаб қилган, талаб рад этилган тақдирда, вилоятнинг автономлик мақоми бекор қилинишини маълум қилган.

Карлес Пуждемон ўз мактубида Испания ҳукумати билан икки ойлик музокаралар ўтказишни таклиф қилган. бундан ташқари, Испания ҳукуматидан Каталония аҳолиси ва ҳукуматига қарши тазйиқ ўтказишни тўхтатишни талаб қилган. Каталония раҳбари референдум ўтказилган 1 октябр куни Испания полицияси томонидан сайловчиларга қарши куч ишлатилишини кескин қоралаган.

Ўз навбатида, Испания ҳукумати Каталониянинг жавобидан қониқмаганини маълум қилган ва мустақиллик даъвосидан воз кечиш учун пайшанба кунигача вақт борлигини эслатган. Испания бош вазири ўринбосари Саэнз де Сантамария Каталония президентини Испания парламенти қаршисида, Испания қонунларига риоя қилган ҳолда музокара олиб боришга чақирган.

Эслатиб ўтамиз, Каталония мухтор вилоятида 1 октябр куни мустақиллик учун референдум бўлиб ўтган эди. Испания ҳукумати референдум ўтказилишига қаршилик қилган ва сайлов участкаларини ёпиб қўйган. Референдум кунида Испания полицияси ва аҳоли ўртасида тўқнашувлар юз бериши оқибатида 900 нафардан зиёд намойишчилар жароҳат олган. Кучли қаршиликка қарамасдан, референдумда сайловчиларнинг 43 фоизи иштирок этган. Каталония ҳукумати референдумда сайловчиларнинг 90 фоизи мустақиллик учун овоз берганини маълум қилган.