Жорий йилнинг 19 октябрь куни Миллий хавфсизлик хизмати Фарғона вилоят бошқармаси, Фарғона вилоят божхона бошқармаси ва Бош прокуратура ҳузуридаги департаментнинг Фарғона вилоят бошқармаси ходимлари томонидан олиб борилган тезкор тадбир натижасида яна бир ноқонуний хатти-ҳаракатга чек қўйилди. Бу ҳақда Давлат божхона қўмитаси Telegram ижтимоий тармоғидаги расмий канали орқали хабар берди. 

Ўрганишлар шуни кўрсатдики, Фарғона шаҳридаги Мангулик кўчасида истиқомат қилувчи фуқаро Оминахон Акбарова (мақоладаги барча исм-шарифлар ўзгартирилган) ўз хонадонида яширин тарзда қўлбола спиртли ичимликлар тайёрлаш билан шуғулланиб келган.

Хонадон холислар иштирокида кўздан кечирилганида, қўлбола арақ маҳсулотларини ишлаб чиқариш учун мўлжалланган яширин цех фаолият юритаётгани, хусусан, ушбу цех ишчиси Миржалол Саматов турли номдаги қўлбола арақ маҳсулотларини тайёрлаётгани аниқланди. 

Яширин цехни кўздан кечириш натижасида, 0,5 литр ҳажмли шишаларда “Медовый вкус”, “Масков”, “Мастона” номли қўлбола арақ маҳсулотлари, 595 литр этил спирти, 840 литр тозаланган минерал сув, 0,5 литр ҳажмли 800 дона бўш шиша, 23875 дона акциз марка, 56500 дона арақ идиши қопқоқлари, 8417 дона ва 2 ўрам (“Масков”, “Мастона”, “Тундра” номли) ёрлиқлар, 39,7 кг. коғоз қутилар, 1 дона арақни қадоқлаш ускунаси, 30,3 кг. қадоқлаш учун полиэтилен пленка, 1 дона спирт даражасини ўлчовчи градусник ва 1 дона рақамли муҳр борлиги аниқланди.

Тадбир давомида умумий қиймати салкам 58,5 млн. сўмлик 595 литр этил спирти, 123 литр қўлбола усулда тайёрланган спиртли ичимлик ашёвий далил сифатида олинди. 

Ҳозирда юқоридаги ҳолат бўйича суриштирув ҳаракатлари олиб борилмоқда.