Ноябрь ойида Ўзбекистонда Европа тикланиш ва тараққиёт банки (ЕТТБ)нинг ваколатхонаси очилади. Бу ҳақда ЕТТБ президенти Сума Чакрабарти Шавкат Мирзиёевга йўллаган мактубида маълум қилди.
Европа тикланиш ва тараққиёт банки биринчи вице-президенти Фил Беннетт ва таваккалчиликлар бўйича вице-президент Бетси Нельсон ноябрь ойи бошида Тошкентга ташриф буюради.
“Ушбу ташриф доирасида вакилларимиз ЕТТБнинг Тошкентдаги ваколатхонасини расмий равишда очади, ҳукуматингиз вакиллари билан қатор учрашувлар ўтказади, шунингдек, 10-11 ноябрь кунлари Самарқанд шаҳрида бўлиб ўтадиган Марказий Осиёда хавфсизлик ва изчил тараққиёт масалалари бўйича олий даражадаги халқаро конференцияда иштирок этади”, — дейилади ЕТТБ раҳбарининг мактубида.