Полиция АҚШ президенти Дональд Трамп томон у Вашингтондаги Капитолий биноси ёнидан ўтиб кетаётганда Россия байроқчаларини улоқтирган шахсни қўлга олди. Бу ҳақда ABC News маълум қилди.

Ҳодиса 24 октябрь, сешанба куни рўй берди. Эркак ўз ҳаракатлари давомида «Трамп — бу хиёнат!» дея қичқиргани билдирилмоқда. Президент бунга парво қилмади, полиция ҳам дарров муносабат билдирмади.

NBS телеканалига кўра, шу тариқа норозилигини билдирган шахс Райан Клейтон бўлиб, у «Америкаликлар ҳаракатда» гуруҳи вакили ҳисобланади. У июлда Конгрессда президентнинг маслаҳатчиси ва куёви Жаред Кушнерга ҳам Россия байроқларини улоқтирганди.

Аввалроқ Трамп билан юқоридагига ўхшаш ҳолат унинг оммавий чиқишларидан бири вақтида юз берган. Ўшанда Трампга қарши чиқаётганлар унинг нутқи вақтида залда Россия байроқчаларини улоқтира бошлашган, бироқ бу тадбирнинг ўтказилишига халақит қила олмаган.

Трамп сайловларда ғолиб бўлиш учун "Россия билан тил бириктирганликда" айбланиб келинади. Трампнинг ўзи буни инкор қилади. Кремлда ҳам бу айбловлар сафсаталиги айтилади.