Бир неча қизларни Туркияга фоҳишаликка олиб кетаётган аёл ушланди

02.11.2017 | Жамият | 4478

Жорий йилнинг 29 октябрь куни ички ишлар органлари ходимлари томонидан фуқаро Х.Д.И. (1986 йилда туғилган) бир неча аёлларни фоҳишалик билан шуғулланиш учун Туркияга юбормоқчи бўлгани аниқланиб, жиноятчини қўлга олиш борасида тезкор тадбир ўтказилди.

Шу куни соат 17:00ларда ўтказилган тезкор тадбир давомида, Х.Д.И. Тошкент вилояти, Тошкент туманида жойлашган “Қоплонбек” ЙПҲ масканида, фуқаролар У.О.Муминова, Н.К.Мансурова, Л.И.Турсунова ва Р.А.Иброхимовани фоҳиша сифатида ишлатиш мақсадида Қозоғистон Республикаси орқали Туркиянинг Истанбул шаҳрига юбормоқчи бўлган вақтида қўлга олинган.

Мазкур ҳолат юзасидан Яшнобод тумани ИИБ ҳузуридаги Тергов бўлими томонидан Ўзбекистон Республикаси ЖКнинг 135-моддаси 2-қисми “б,е” бандлари (одам савдоси, яъни бир гуруҳ шахслар томонидан олдиндан тил бириктириб, икки ёки ундан ортиқ шахсларни улардан фойдаланиш мақсадида ёллаш) аломатлари билан жиноят иш қўзғатилган. 

Жиноятнинг оғирлилик даражасини инобатга олган ҳолда Х.Д.И.га нисбатан “қамоққа олиш” тарзидаги эҳтиёт чораси танланмоқда.

Ҳозирда жиноят иши бўйича дастлабки тергов ҳаракатлари давом эттирилиб, Х.Д.И.нинг бошқа жиноятларга алоқадорлиги текширилмоқда.