Марказий банк раиси ўринбосари Ботир Зоҳидовнинг қайд этишича, хорижий валютани нақдсиз кўринишда сотилиши вақтинчалик чора ва у курснинг ҳаддан зиёд ўсиши ва спекулятив операцияларни олдини олиш учун киритилган.

“Ҳозир жисмоний шахслар чекловсиз хорижий валютани халқаро тўлов карталарига ўтказиш орқали харид қилиши мумкин. Ушбу карталар чет элда, терминаллар мавжуд бўлган ҳамма жойда ишлатилиши мумкин. Хорижий валютанинг нақд кўринишдаги сотувини яқин вақтда татбиқ этишни режалаштирганмиз. Аниқ вақтни ҳозирча эълон қила олмаймиз”, — дейди МБ раиси ўринбосари ХПКнинг 15 ноябрдаги йиғилишида.

“Либераллаштириш жараёнида бизни энг кўп ўйлантирган масала – маблағ, резервларимизнинг етиш ёки етмаслигини билиш эди. Ҳозир биз йиғилган олтин-валюта захираларимизни сарфламоқчи эмасмиз. Чунки курс бозор тамойилларидан келиб чиққан ҳолда ўзгаришини эълон қилдик. Бу эса бизнинг жараёнга аралашмаслигимизни англатади. Сўнгги 2,5 ой ичида биржадаги валюта сотувлари харидлардан ошди. МБ олтин захираларини ўсишини эътиборга олган ҳолда сотувлардаги фарқ – 325 млн долларни сотиб олди. Охирги 2 ой ичида мамлакатнинг олтин-валюта захираси 750 млн долларга ошди! Ноябрь ҳолатига кўра, фақат олтин-валюта захираси 23,6 (ОЛДИНГИ ХАБАРДА – 26!) млрд долларни ташкил қилди”, – дейди Ишметов.

Шунингдек, унинг сўзларига кўра, либераллаштириш даври мобайнида Марказий банк ўз валюта манбаларини ишлатмади.