2017 йил 7 апрелида Швеция пойтахти Стокгольмда теракт уюштиришда айбланаётган ўзбекистонлик Раҳмат Оқилов судда кўрсатма беришни бошлади. Бу ҳақда «РИА Новости» хабар бермоқда.

Теракт юзасидан суд иши 13 февраль куни прокуратура материаллари билан танишишдан бошланди. Эшитувларнинг охирги куни 9 майга белгиланган, суд қарори июнь ойининг иккинчи ярмида чиқарилиши режалаштирилган.

Суд чоғида ўз мотивлари ҳақида гапирар экан, Раҳмат Оқилов Швеция ИШИДга қарши курашда иштирок этишдан тўхташини истаганини билдирди.

Олдинроқ Швеция прокуратураси Раҳмат Оқилов жиноятни ИШИД номидан амалга ошириб, Швеция аҳолиси орасида қўрқув уйғотиш йўли билан ҳукуматни ИШИДга қарши операциядан воз кечишга ундашни режалаштирганини билдирган эди. Аммо ИШИДнинг ўзи теракт учун жавобгарликни зиммасига олмади.

Эслатиб ўтамиз, теракт оқибатида беш киши ҳалок бўлган, 15 киши яраланган эди. Бош гумондор — 39 ёшли Раҳмат Оқилов ўша куни ҳибсга олинган эди.