Тожикистон молиявий назорат ва коррупцияга қарши кураш давлат агентлиги “Азия-тур” компанияси раҳбари Каромат Содиқовани ҳибсга олди. Терговга яқин манбанинг айтишича, Каромат Содиқова 24 февраль куни ушланган.

Тадбиркор аёлга нисбатан ТР Жиноят кодексининг иккита моддаси –катта миқдорда фирибгарлик ва ҳужжатларни сохталаштириш бўйича жиноий иш қўзғатилди.

Манбанинг айтишича, Содиқова хитойлик тадбиркор, «Лен Ху А» компанияси раҳбари ва Тожикистондаги Хитой маданият маркази директори Джен Ху Анинг аризаси бўйича ҳибсга олинган. У Содиқовани сохта ҳужжатлар билан сурма ишлаб чиқарувчи корхонани эгаллаб олганликда айблаб чиқди. Хитойлик бизнесмен Сўғд вилояти Гулистон(собиқ Қайраққум) шаҳри яқинидаги Чойрукдарон қишлоғидаги корхона учун 1 млн сомони киритган.

Хитойлик тадбиркорга яқин манбанинг айтишича, Джен Ху А икки йил муқаддам коррупцияга қарши кураш агентлигига «Азия-тур» компанияси раҳбари устидан шикоят қилган, аммо шундан сўнг босимга учраган ва Тожикистонни тарк этган.

2016 йилнинг сентябрида хитойлик тадбиркор, ўзининг ҳамкори «Азия-тур» компанияси раҳбари сохта ҳужжатлар тайёрлаб корхонага мол-мулк киритгани ва бу иншоатлар «Ориёнбанк»да гаровда турганлиги ҳақида маълум қилган эди. Джен Ху Анинг таъкидлашича, ўзининг мулки «Азия-Тур» компанияси ва банк ўртасида аввалдан ишлаб чиқилган режа асосида эгаллаб олинган. Унинг сўзларига қараганда, Каромат Содиқова сохта мактуб билан «Ориёнбанк»дан 1 миллион сомонига яқин кредит олган, аммо пулларни қайтармаган. Натижада банк компания олган кредитларни қайтаришни хитойлик тадбиркор Джен Ху Адан талаб қилган.

Азият чеккан бизнесменнинг айтишича, икки йилдан бери Каромат Содиқова ва «Ориёнбанк» билан судлашмоқда. Содиқова ўзига қўйилаётган айбларни инкор қилади. Судлашувлар корхонанинг ёпилишига ва 130 нафар кишининг ишдан маҳрум бўлишига олиб келди.