27 август куни Москва шимолидаги «Печатный экспресс» босмахонасида юзага келган ёнғин оқибатида 17 киши қурбон бўлган эди. Россия Федерацияси Ички ишлар вазирлиги Москва шаҳри Бош бошқармаси воқеа жойини бир неча бор текширди, деб хабар беради РИА Новости. Москва ИИББ полиция бошлиғи ўринбосари Геннадий Голиковнинг РФ Жамоатчилик палатаси давра суҳбатида маълум қилишича, ёнғинда ҳалок бўлган мигрантлар у ерда ноқонуний яшашмаган.
«Ушбу ёнғиндан сал аввалроқ Москва бўйлаб кенг кўламли «Заслон» тадбири ўтказилган ва унда миграция қонунчилигига риоя этилиши бўйича ҳам текширувлар бўлган. Операция давомида участка инспектори айни шу объектни уч марта, жумладан, кундузги ва кечки вақтларда текширган. Мазкур ҳудудда ноқонуний яшаш ҳолати аниқланмаган», дейди Голиков.
Нашрнинг таъкидлашича, ушбу ёнғинда жами 17 киши ҳалок бўлган, улардан 14 нафари Қирғизистон, 3 нафари эса Россия фуқаролари бўлган. Қирғизистон Ташқи ишлар вазирлиги берган маълумотларга кўра, бу ёнғинда ҳалок бўлганларнинг барчаси ёш жувонлар, аксарияти 18-25 ёшларда бўлган. Ёнғинда қурбон бўлганларнинг жасади ортилган ҳамда уларнинг яқинлари чиққан махсус самолёт 29 август куни Қирғизистонга учиб келган.