Қашқадарёда ошхоналарга ит ва эшак гўшти тарқатиб келган 62 ёшли эркак устидан суд бўлиб ўтди

05.05.2018 | Ўзбекистон | 4335

Қашқадарё вилояти Қарши туманида яшовчи Иззатилла Соҳибов ошхоналарга ит ва эшак гўштини тарқатиб келгани аниқланди, деб хабар бермоқда Даракчи газетаси.

Ушбу ҳолат жиноят ишлари бўйича Қарши шаҳар судининг очиқ мажлисида кўриб чиқилган. 62 ёшли И.Соҳибов одамлардан касалланган ва ўлган мол, ит ва эшак гўштини арзон-гаровга олиб, Қарши шаҳридаги ошхона ва чойхоналарда мўмай пулга сотган.

Маҳкама жараёнида И.Соҳибов истеъмолчиларнинг ҳаёти ва соғлиғига хавф туғдирувчи маҳсулот тарқатишда айбланган.

Жиноят ишлари бўйича Қарши шаҳар суди раиси Анвар Элмуродов судланувчига 8 миллион 612 минг сўм жарима тайинлаган. Судья А.Элмуродовга кўра, И.Соҳибов айбига иқрорлиги, пушаймонлиги, нафақахўрлиги боис унга шундай енгил жазо тайинланган.