КХДР етакчиси Ким Чен Ин Пекинга етиб келди. Япониянинг Nihon Television Network телекомпанияси операторлари у қандай қилиб ҳукумат самолёти бортидан тушиб келганлигини суратга олишган.

Flightradar24 порталидаги маълумотларга қараганда, Пекиндаги аэропортга қўнган самолёт Шимолий Кореянинг "Корё" давлат авиакомпаниясига тегишли ўша — ўтган ҳафта Сингапурда КХДР етакчиси АҚШ президенти Дональд Трамп билан учрашиш учун борган самолётнинг ўзи эканлигини маълум қилган.

Кутилишича, Ким Чен Ин КХР раиси Си Цзиньпинь билан 12 июнь куни бўлиб ўтган АҚШ-КХДР саммитини муҳокама қилиш учун учрашади. Улар шунингдек, музокараларнинг истиқболи ҳақида ҳам тўхталадилар.

Ким Чен Иннинг ташрифи икки кун: 19-20 июнь кунлари давом этади, деб хабар қилган Синьхуа.

КХДР етакчиси Хитойга 25-28 март кунлари норасмий сафар уюштирган эди. Бу унинг 2011 йилда ҳокимияттепасига келгандан кейинги илк хорижий сафари эди. Аммо бу сафар ҳақида то унинг якунига қадар ҳеч кимга хабар берилмади.

Ким Чен Ин ва Си Цзинпинь ўртасидаги иккинчи музокаралар 7-8 май кунлари ўтказилди.