Тошкент шаҳар ИИББ томонидан қатор жиноятларни қилганликда айбдор деб топилга Аббос Ходжаев cуд ҳукмига кўра оқланди

19.06.2018 | Жамият | 7230

Судья Мирзиёд Абидов Аббос Ходжаев ва унинг “шериги” Махамаджон Қурбановга нисбатан оқлов ҳукмини чиқарди. Жиноят ишлари бўйича Олмазор туман суди ўз биносида Аббос Ходжаев ва Махамаджон Қурбановга нисбатан суд терговини олиб борди.

UzNews.uz” нашрининг хабар беришича, cудья Мирзиёд Абидов Ўзбекистон Республикаси номидан ҳукм ўқиди.

Ҳукмда Ходжаев Аббосхон Аҳмадович Ўзбекистон Республикаси Жиноят Кодексининг 165-моддаси 2-қисми “а,в” бандлари, 25, 273-моддаси 5-қисми билан ОҚЛАНСИН, - деб кўрсатилган.

Шунингдек, Қурбанов Махамаджон Кадиржановичга нисбатан ҳам ҳукмда Ўзбекистон Республикаси Жиноят Кодексининг 165-моддаси 2-қисми “а,в” бандлари билан ОҚЛАНСИН, -деб қайд қилинган.

Иш бўйича олинган гиёҳвандлик воситасининг тақдири эса очиқ қолдирилиши ҳукмда ўз аксини топган.

Ушбу иш жараёнида айбланувчиларнинг ҳуқуқларини ҳимоя қилган “Olmazor advokatlari” адвокатлар ҳайъати адвокатлари Ё. Худоёрова ва Н. Туляганов ҳамда Тошкент шаҳар “Adolat ustivorligi sari” адвокатлар ҳайъати адвокати К. Юсупов, Тошкент шаҳар “Jumanov himoyasi” адвокатлик бюроси адвокати И. Жуманов биз билан суҳбатда Президентимиз Шавкат Мирзиёев томонидан судларнинг олдига қўйилган вазифа, маълум бир маънода бажарила бошлангани ҳамда судлар адолатли ҳукм чиқара бошлаганини таъкидлаб ўтишди. Аббосхон Ходжаев “иши”ни эса бунга мисол сифатида кўриш мумкинлигини айтишди.

Ушбу суд жараёнида кузатувчи сифатида қатнашган инсон ҳуқуқлари фаоли Аъзам Турғунов ҳамда мустақил журналист Малоҳат Эшонқулова ҳам суднинг адолатли ҳукм чиқарганини олқишлашди.

Эслатиб ўтамиз, Аббосхон Ходжаев ҳамда Махамджон Қурбанов Тошкент шаҳар ИИББ томонидан қатор жиноятларни қилганликда айбдор деб топилган эди.