Индонезияда Осиё ўйинларининг якуний баҳслари ўтказилмоқда. Бугун Ўзбекистон самбо жамоасининг яна 4 нафар вакили ўз имкониятларини синовдан ўтказишди ва якунда икки медалга эга чиқишди.
Дастлаб, -90 кг вазн тоифасидаги Неъмат Ёқубов саралаш баҳсларида иштирок этди. У дастлабки рақиби таиландлик Женгхор Сонрам устидан 4:0 ҳисобида ғалаба қозонди.
Унинг нимчорак финалдаги рақиби қирғизистонлик Урмат Мамбетжан улу бўлди. Ёқубов иккинчи жангида ҳам ғалаба қозонди - 2:0. Аммо у чорак финалда қозоғистонлик Айтбек Айболга 1:3 ҳисобида ютқазди. Шундан сўнг бронза учун ўтиш баҳсларида иштирок этган Ёқубов туркманистонлик Руслан Эсегеровга ютқазиб қўйди.
Аёл самбочилар ўртасидаги баҳсларда -68 кг вазн тоифасидаги Нилуфар Давлетова иштирокини саралашдан бошлади. У илк рақиби, ливанлик Суэллен Силвани 4:0 ҳисобида енгди. Нимчорак финалда таиландлик Титапа Жунсукплунг ҳам таслим этилди - 4:0. У чорак финалда индонезиялик Аманда Мутиарани 4:0, ярим финалда қозоғистонлик Динара Кударовани 4:0 ҳисобларида мағлуб этиб, финалга чиқди.
Шундан сўнг у финалда олтин медал учун қозоғистонлик Дилдаш Куришбаевага қарши гиламга чиқиб, 0:3 ҳисобида ютқазиб қўйди ва кумуш медал билан кифояланадиган бўлди.
Ўзбекистонлик яна бир самбочи, -68 кг вазн тоифасидаги Гулмира Исматова баҳсларга нимчорак финалдан қўшилди. У дастлабки рақиби, суриялик Ҳасна Сайдни 4:0 ҳисобида енгди. Аммо чорак финалда мўғулистонлик спортчидан енгилди.
Шундан сўнг, бронза медал учун ўтиш баҳсларига қўшилган Исматова дастлаб индонезиялик Сакина Сакина тўсиғидан ўтди - 4:0. Лекин у иккинчи босқичда япониялик Томи Нацукига ютқазиб қўйди - 0:2.
Ўзбекистоннинг -90 кг вазн тоифасидаги иккинчи вакили Камолиддин Холмуродов баҳсларга нимчорак финалда қўшилди ва дастлаб япониялик Сато Ёсукини мағлуб этди - 3:0. Чорак финалда эса у эронлик Ираж Амирханидан устун келди - 4:0. Ярим финалда тожикистонлик Комроншоҳ Усторпиёнга қарши гиламга чиққан Холмуродов 3:0 ҳисобида ғалабага эришиб, финал йўлланмасини қўлга киритди.
У финалда тожикистонлик Умед Ҳасанбоевга қарши жанг қилди ва 3:0 ҳисобида ғалаба қозониб, Ўзбекистон ҳисобига 21-олтин медални олиб келди.
Айни вақтда умумий рейтингда Ўзбекистон делегацияси жами 70 медал билан (21 олтин, 24 кумуш ва 25 бронза) бешинчи ўринни мустаҳкамлади.
Олтинчи ўринда жойлашган Эрон делегацияси ҳисобидаги медаллар сони 60та ва шундан 19таси олтин, 19таси кумуш, 22таси бронза.
