Россия расмийлари Google ширкатини Кремль танқидчиси Алексей Навальнийга YouTubeда оммавий норозилик намойишларига чиқишга чорловчи видеоларни юклаш имконини бериш орқали жорий ҳафтага белгиланган маҳаллий сайловларга “аралашмаслик” ҳақида огоҳлантирди.
4 сентябрь куни Россия Федерация кенгаши йиғинида Марказий сайлов комиссияси, Бош прокуратура ҳамда Роскомнадзор вакиллари Google бўйича шикоятларини муҳокама қилишди.
Расмийлар Навальний YouTubeда Россияда “ноқонуний“ бўлган маълумотларни тарқатаётганини иддао қилиб, Google буни тўхтатмаса, ширкатга қарши чора кўрилиши ҳақида огоҳлантирди.
Навальний YouTubeдаги канали орқали россияликларни 9 сентябрь куни пенсия ислоҳотларига қарши намойишга чиқишга чорлаб келади. Айнан шу кунда бир неча вилоятда ҳамда Москва шаҳрида маҳаллий сайловлар бўлиб ўтади.