Хорижда қийин аҳволда қолган ўзбекистонликларнинг 42 кишидан иборат иккинчи гуруҳи 22 октябрь куни Ўзбекистонга қайтарилди, деб хабар қилди Ташқи меҳнат миграция агентлиги Самарқанд вилояти филиали директори Абдуазиз Хафизов.
"Юртдошларимизни Тошкент Халқаро аэропортида қариндошлари ҳамда Ўзбекистон Республикаси Бандлик ва меҳнат муносабатлари вазирлиги ҳузуридаги Ташқи меҳнат миграцияси масалалари агентлиги раҳбари Равшан Ибрагимов, Ички ишлар, Соғлиқни сақлаш вазирликларининг масъул вакиллари кутиб олишди", - деди Хафизов.
Шундан сўнг, фуқаролар Ташқи меҳнат миграцияси масалалари агентлигига олиб борилиб, у ерда тўлиқ тиббий текширувдан ўтказилган. Фуқаролар саломатлиги назоратга олингач, Агентлик раҳбари Равшан Ибрагимов, ташқи меҳнат миграцияси ва қайтиб келган меҳнат мигрантларини реинтеграциялаш дастури бошқармаси бошлиғи Дилафруз Икромова, ишсиз аҳолига хизмат кўрсатиш бўйича "Ишга марҳамат" мономаркази директори Дилобар Исмоилова ҳамда "Микрокредитбанк" масъул ходими иштирокида учрашув ўтказилган.
"Учрашувда хорижда оғир аҳволда қолган фуқароларнинг бандлигини таъминлаш, уларнинг келгуси фаолиятлари учун керакли имкониятларни яратиш, жумладан, хусусий тадбиркорликни йўлга қўйишлари учун микрокредитлар ажратиш бўйича тавсия ва кўрсатмалар берилди", - деб таъкидлади Хафизов.
Ўзбекистонликларга уларнинг яшаш манзилига қадар йўл харажатларини қоплаш мақсадида энг кам ойлик иш ҳақининг бир баробари миқдорида пул маблағлари тарқатилган.
Фуқароларни Ўзбекистонга қайтариш билан боғлиқ ташкилий ишлар Ўзбекистон Республикаси резидентининг 2018 йил 5 июлдаги "Ўзбекистон Республикасининг ташқи меҳнат миграция тизимини янада такомиллаштириш бўйича қўшимча чора-тадбирлар тўғрисида”ги қарори билан Ўзбекистон Республикаси Бандлик ва меҳнат муносабатлари вазирлиги ҳузурида ташкил этилган Хорижда меҳнат фаолиятини амалга оширувчи шахсларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси ҳисобидан амалга оширилган.