Telegram мутахассислари мессенжерга уни Twitter, Instagram, Gmail каби бошқа сервислар билан интеграциялаш имкониятини тақдим этадиган IFTTT (If This Then That) функциясини қўшдилар. Бу ҳақда кеча Telegram’нинг блогида маълум қилинган, деб ёзади Terabayt.uz.

IFTTT платформаси 360 дан ортиқ турли (Twitter, Instagram, Gmail, Dropbox, Google Drive, Spotify, Pinterest ) сервисларни ўзаро синронизация қилиш имкониятини беради. Оддийроқ қилиб тушунтирсак, эндиликда фойдаланувчилар Telegram орқали бошқа сервисларни бошқаришлари ёки уларда нашр қилинган контентни мессенжерда қабул қилишлари мумкин бўлди.

Бунинг учун @IFTTT ботни ишга тушириш ва платформада рўйхатдан ўтиш талаб этилади. Шундан кейин мессенжер билан интеграцияланиши керак бўлган сервисларни созлаш мумкин.

Шунингдек, @IFTTT ботни гуруҳ ёки шахсий каналга қўшиш имконияти ҳам мавжуд. Жумладан, мазкур бот ёрдамида мессенжерга Instagram-аккаунтдан суратларни юклаш функциясини созлаш мумкин.

Бундан ташқари, мессенжерда муҳим суҳбатларни чат рўйхатининг юқори қисмига маҳкамлаш имконияти ҳам пайдо бўлди. Бу муҳим одамлардан келадиган хабарларни ўтказиб юбормасликка ёрдам беради.

Сервиснинг Android иловаси учун бир қатор янги функциялар ҳам қўшилган. Илованинг 3.15 версиядаги Android иловасида 3 та янги имконият пайдо бўлган. Булар: Photo Editor‘да суратларни юқори аниқликда айлантириш, видеони чат мобайнида томоша қилиш ҳамда сақланган ва каналлардаги медиафайлларни махфий чатларга импорт қилиш функциялари.

Telegram’нинг янги версияларини қуйидаги ҳаволалардан юклаб олишингиз мумкин:

Android версия.

iOS версия.