Бир гуруҳ Нобель мукофоти совриндорлари БМТ Хавфсизлик Кенгашига очиқ хат йўллаб, Мьянмада этник тозалаш ва инсониятга қарши жиноятлар туфайли авж олган қирғинбаротни тўхтатишга чақирган.
“Агар чора кўрмасак, одамлар ўқдан бўлмаса-да, очликдан ҳалок бўлади”, – дейилган 23 нафар Нобель мукофоти совриндори имзо чеккан мактубда.
Улар Мьянманинг Ракхайн штатида мусулмонларга қарши амалга оширилаётган қирғинни 1994 йили Руандада юз берган геноцид, Судданнинг Дарфур шаҳри ҳамда Косово ва Боснияда амалга оширилган этник тозалашга қиёслаган.
БМТ Хавфсизлик Кенгашига йўлланган хатда Ракхайн штатидаги вазият учун Мьянма раҳбарияти танқид қилинган. Қизиғи, Мьянма етакчиси Аун Сан Су Чжининг ўзи ҳам Нобель мукофоти совриндори ҳисобланади.