"Краснодар" Одил Аҳмедовнинг Хитой клубига ўтганлигини расман эълон қилди

30.12.2016 | Спорт | 998

Ҳамюртимиз Одил Аҳмедов ўз фаолиятини Хитойнинг «Шанхай СИПГ» клубида давом эттирадиган бўлди. Бу ҳақида «Краснодар» расмий сайти эълон қилди.

«Краснодар» мухлислари Аҳмедовни яхши кўришар эди, унинг ақлли, тартибли ва ҳар бир ўйинда бор кучини бериб ўйнаши жамоа мураббийлари эътиборидан четда қолмади. «Краснодар» ФК жамоаси икки ярим йиллик меҳнатлари учун Одилга миннатдорчилик билдиради ва Хитойдаги фаолиятига муваффақиятлар тилайди», — дейилади «буқалар» расмий сайтида.

Аввалроқ трансфер қиймати 7 миллион евро атрофида бўлиши мумкинлиги ҳақида хабар берилганди. Аҳмедов жорий мавсумда Россия чемпионатида 14 ўйин ўтказиб, 1 та голли узатмага муаллифлик қилди. 

Маълумот учун, «Шанхай СИПГ» клубида бразилиялик Халк ва Оскар каби футболчилар тўп суради. Жамоа бош мураббийи эса португалиялик Андре Виллаш-Боаш саналади.