Менинг исмим Абдулазиз Духон. Ёшим 18 да. Мен Сурияни тарк этган 4 миллион кишидан бириман. Биз қалбларимизни ва йўлда йўқотиб, дафн этган одамларни ортда қолдириб келдик.
Ушбу мактубни сизни президентликка сайланганингиз билан табриклаш учун ёзяпман. Шу билан бирга, сизнинг сўзларингиз бизнинг келажагимиз ҳал бўлишида қанчалик муҳим ўрин тутишини эслатиш учун ҳам.
Биз инқилобни қўлимизда атиргуллар тутган ҳолда ва халқаро ҳамжамиятдан кўмак умидида бошлаган эдик.
Йиллар ўтди; атиргуллар қуролга алмашди, аммо ёрдам умиди ҳамон давом этмоқда. Бизга на атиргуллар, на умид ёрдам берди.
Сиздан олдин ишлаган ҳамкасбингиз қисматимизни ўзгартириш учун бирор нима қила олдими? Мен билмайман. Аммо биз ишонишда давом этамиз. Сизнинг сўзларингиз биз учун аҳамиятли.
Мен инқилоб бошланганидан 4 йил ўтиб оилам билан бирга Сурияни тарк этдим. Ҳеч ким кетишни хоҳламади. Аммо танкларга қарши нима ҳам қила оламиз? Осмондан ўлим ёғилиб турса, қўлимиздан нима ҳам келарди?
Аксарият одамлар каби биз ҳам Туркияга бордик, у ердан эса Грецияга. Шаҳримиз, кўчаларимиз ва уйларимиз вайрон этилаётганини томоша қилганча сафар қилдик.
Биз заифмиз. Биз халқаро ҳамжамиятнинг кўмагини истадик ва у келишини биламиз. Ишонч бизни кўчишга ундади ва олға боришни кўрсатмоқда.
Айни дамда мен қочқинман. Қочқинлар лагерьида яшашда энг қийини – изоляция. Одамлар атрофимизни ўраб тургувчи деворлар қуришди. Бошқа мамлакатлар эса шу деворларнинг атрофида яна деворлар барпо қилишди.
Ҳурматли бўлажак президент, чегаралар орзуларни ўлдиради. Мен орзуларнинг таналардан олдин ўлаётганини кўрдим – бундай инсонлар руҳсиз жасадга айланади. Сиздан илтимос, қалбида ишончи сўнмаган биз каби инсонлар учун олдимизни деворлар билан тўсманг!
Балки, бугун мен учун қочқин сифатидаги сўнгги кундир. Эртага дунёнинг қайсидир чеккасида хавфсиз жойда бўларман. Балки, жонажон Сурияга қайтиб, қайта қуришни бошларман. Балки, яна бир кун учун умид қила оларман.
Қадрли президент, бирон киши сўзимизни эшитармикин деб умид қиляпмиз. Буни сиз қиласиз деган умидимиз бор.
Абдулазиз Духон, суриялик қочқин.
Aljazeera.com сайтидан олинди.