Флорида штатининг Жексонвил шаҳридаги шифохонадан 1998 йилда ғойиб бўлган чақалоқ Жанубий Каролина штатидан топилди, дея хабар бермоқда Рейтерс агентлиги.

Маълум бўлишича, бугунги кунда Жанубий Каролинадаги Валтерборо шаҳрида яшайдиган 18 ёшли Камияҳ Мобли ҳамшира кийимидаги аёл томонидан ўғирлаб кетилганда туғилганига эндигина бир неча соат бўлган эди.

У айни кунларда бошқа исм билан яшамоқда. Расмийлар унинг ҳозирги исмини ошкор қилишмаган. Жексонвил шаҳри шерифф офиси берган маълумотга кўра, қизни тарбиялаб катта қилган 51 ёшли Глория Уилямс бола ўғирлашда айбланиб ҳибсга олинган.

Тиббий текширувлар қизнинг саломатлиги яхши ҳолатда эканлигини кўрсатган. У ўзини чақалоқлигида ўғирлаб кетгани гумон қилинган аёлни онаси деб ўйлайди. Қизнинг ҳақиқий ота-онаси у ҳақидаги хабарни хурсандчилик билан кутиб олишган.

Глория Уилямс айни дамда Флоридага келтирилган ва уни умрбод қамоқ жазосига ҳукм қилишлари мумкин. Қизнинг келажаги ва ҳақиқий оиласи билан муносабатлари масаласи унинг ўзи томонидан ҳал қилиниши маълум қилинган.