АҚШнинг янги сайланган президенти Доналд Трампнинг Буюк Британиянинг London Times газетасига интервью берди, дея хабар бермоқда Reuters агентлиги.
Якшанба куни бўлажак президентнинг Майкл Гов билан суҳбатида Россияга қарши санкцияларни бекор қилиш масаласига ҳам эътибор қаратилди. Доналд Трамп биринчи марта санкцияларни бекор қилиш учун Россиядан нима талаб қилиши масаласига ойдинлик киритди.
Унинг айтишича, АҚШ иқтисодий чекловлардан воз кечиши учун Россия ядровий қуролларни қисқартириши лозим бўлади. «Улар Россияга қарши санкциялар қўллашди. Кўрайликчи, Россия блан яхшироқ келишувлар қила оламизмикин? Аввало, ядровий қуроллар камайтириши ва қисқартирилиши керак деб ўйлайман. Бу (келишувнинг) бир қисми. Айни пайтда Россия санкциялар туфайли жуда қийналмоқда, аммо, ўйлайманки, жуда кўп одамларга наф келтирадиган нимадир содир бўлади», – дея Трампнинг сўзларидан иқтибос келтиради Таймс нашри.
Ядровий қуролларни назорат қилиш масаласи 2010 йилда АҚШ ва Россия ўртасида янги «Стратегик қуролларни қисқартириш бўйича келишув» имзолангандан бери биринчи марта кўтарилмоқда. АҚШ ва Россия дунёнинг энг йирик ядровий давлатлари ҳисобланади.
20 январь АҚШ президенти сифатида вазифасига кириши кутилаётган Доналд Трамп бир ҳафта ишида иккинчи марта Россияга қарши санкцияларни олиб ташлаш ҳақида фикр билдирмоқда. Жума куни Wall Street Journal нашрига берган интервьюсида санкцияларни бекор қилиш учун Россия АҚШга ёрдам бериши лозимлигини айтган эди.
Доналд Трамп, шунингдек, суҳбат давомида АҚШнинг олдинги ташқи сиёсатини танқид қилган ҳамда Ироқ босқинини АҚШ тарихидаги энг жиддий хато деб атаган ва урушни «ари уясини қўзғатиш»га ўхшатган