Истанбулдаги тунги клубларнинг бирида теракт содир этганликда гумонланиб қўлга олинган Ўзбекистон фуқароси Абдулқодир Машарипов ўз айбига иқрор бўлди, деб хабар қилган сешанба куни Истанбул губернатори Васип Шахин. Бу ҳақда РИА Новости хабар бермоқда.
Илгарироқ Туркия Бош вазири Бинали Йилдирим Истанбулда террорчининг қўлга олингани ҳақида хабар қилган эди.

"Кеча пухта режалаштирилган операция давомида Абу Муҳаммад Хуросоний сифатида машҳур — Машарипов ҳибсга олинди. У 1983 йилда Ўзбекистонда туғилган, 4та тилни билади, Афғонистонда машғулот ўтаган, у — пухта тайёргарлик кўрган террорчи. Тахминан, 2016 йилнинг январида Туркияга кириб келган. Шундан сўнг, Истанбулга келиб, квартира ижарага олган, теракт содир этишдан олдин эса турар-жойини тез-тез ўзгартириб турган. У ҳозирда ўз айбига иқрор бўлди, ҳодиса жойидан топилган қўл излари Машариповникига мос тушди", — деб таъкидлаган Истанбул губернатори Васип Шахин.

Шахин жиноятчини қўлга олиш учун Туркия полициячилари жуда катта ишларни амалга оширганликларини айтиб ўтган.

Шахиннинг сўзларига кўра, гумондорларни қўлга олиш чоғида қурол ишлатилмаган.

Эслатиб ўтамиз, Истанбулнинг Reina клубида содир этилган хунрезлик оқибатида 39 киши қурбон бўлган, 69 шифохонага ётқизилган эди.