БМТнинг Ямандаги инсонпарварлик ёрдами бўйича вакили фуқаролар уруши туфайли 10 минг кишидан кўпроқ одам ҳалок бўлганини маълум қилди. Бу ҳақида Al Jazeera​ хабар бермоқда.

Жеми Макголдрикнинг маълум қилишича, уруш оқибатида яна 40 минг киши жароҳат олган. Унинг фикрича, бу кўрсаткичлар тиббий хизматлар томонидан қайд қилинган рақамларга таянган ҳолда йиғилган бўлиб, ҳақиқий миқдорлар бундан анча кўпроқ бўлиши мумкин.

БМТ вакили, шунингдек, 10 миллион яманликнинг ҳаёти хавф остида эканлигини маълум қилган. Ямандаги уруш қурбонларига оид бундай улкан рақамлардан иборат маълумот БМТ расмийси томонидан илк бор эълон қилинмоқда. БМТнинг яна бир вакили Фарҳан Ҳақ Ямандаги низони зудлик билан ҳал қилишга чақирган. «Акс ҳолда, аҳоли янада улкан йўқотишга учраши мумкин», – деб айтган БМТ вакили.

Яманда икки йилдан бери давом этаётган фуқаролар уруши туфайли мамлакат гуманитар ҳалокат ёқасига келиб қолган. Аҳоли очарчилик, юқумли касалликлар ва ичимлик суви етишмаслиги шароитида кун кечирмоқда. Ҳаво ҳужумлари оқибатида тиббий инфратузилма бутунлай вайрон бўлган.

Эрон дастаклаётган ҳусий исёнчилари томонидан пойтахт Сананинг қўлга киритилиши ортидан, араб давлатларидан иборат коалиция 2015 йилнинг март ойида исёнчиларига қарши ҳарбий ҳаракатлар бошлаган эди.

БМТ томонидна урушаётган томонларни келиштириш ва Яманда тинчлик ўрнатиш бўйича амалга оширилаётган ҳаракатлар ҳозирча бирор натижа бермаган. Ҳокимиятни янги тузилажак қўшма ҳукуматга топшириш ва исёнчилар пойтахтни тарк этишини назарда тутувчи БМТ таклиф этган лойиҳа Яманнинг қочиб кетган президенти Абдуррабу Мансур Ҳадий томонидан рад этилган.