Ўзбекистон махсус хизматлари Истанбулда янги йил тунида террорчилик ҳаракатини содир этишда гумонланиб қўлга олинган шахс билан боғлиқ вазиятни ўрганишмоқда, ҳозирча Истанбулдан расмий маълумот келиб тушмади,  дея хабар берди РИА Новости.

"Истанбулда қўлга олинган шахс борасидаги ҳолат мониторинг қилинмоқда, лекин айни пайтга қадар турк томонидан расмий ҳужжатлар келгани йўқ", — деди суҳбатдош. Унинг айтишича, қўлга олинган шахснинг фуқаролиги ҳақида гапиришга ҳали эрта.

Истанбул губернатори Васип Шахин ўзбекистонлик Абдулқодир Машарипов ўз айбига иқрор бўлди, деб маълум қилди.

Шахиннинг айтишича, у 1983 йилда Ўзбекистонда туғилган, 4та тилни билади, Афғонистонда машғулот ўтаган, у — пухта тайёргарлик кўрган террорчи. Тахминан, 2016 йилнинг январида Туркияга кириб келган. Шундан сўнг, Истанбулга келиб, квартира ижарага олган, теракт содир этишдан олдин эса турар-жойини тез-тез ўзгартириб турган.

Унинг сўзларига кўра, Машарипов террорчилик уюшмалари билан алоқадор бўлиши мумкин. У билан биргаликда уч нафар аёл ва ироқлик эркак қўлга олинган.