Гамбиянинг сайловда мағлуб бўлган президенти ҳокимиятдан кетишдан бош тортар экан, Африка ғарбидаги сиёсий вазият кескинлашиб бормоқда, дея хабар беради Reuters агентлиги.

1 декабрь куни бўлиб ўтган сайловда ғалаба қозонган Адама Барроуни ҳокимиятга келтириш учун қўшни давлатлар ҳарбий куч ишлатиши мумкин. Чоршанба куни Гамбия чегараси яқинига жойлаштирилган Сенегал армияси Яҳё Жамммиҳ ҳокимиятни топширмайдиган бўлса, Гамбия ҳудудига кириши мумкинлигини эълон қилди.

Бу ҳақида Сенегал армияси вакили полковник Абду Ндиае маълум қилган. Полковник Яҳё Жаммиҳнинг ҳокимиятни ўз ихтиёри билан топширишини ваколат муддати тугайдиган ярим тунгача кутилишини айтган.

22 йиллик президентнинг ҳокимиятдан тинч йўл билан кетишини Африканинг бошқа давлатлари ҳам талаб қилмоқда. Нигерия ҳаво кучлари гамбия чегарасига яқин Сенегал ҳудудига олиб кирилган. Нигерия ҳукумати Жаммиҳ ҳокимиятдан кетмайдиган бўлса, ҳарбий куч ишлатилишини эълон қилган.

Гананинг яқинда ҳокимиятга келган президенти Нана Акуфо-Аддо эълон қилган баёнотда ҳам Барроу президентлик курсисига ўтириши учун аскарларини жўнатишилиши маълум қилинган. Сенегал БМТ Хавфсизлик Кенгашига Гамбия халқининг хоҳиш-иродасини амалга оширишни қўллаб-қувватлашг адоир резолюция лойиҳасини тақдим этди.

Гамбиия президентлигига сайланган Барроунинг вакили Ҳалифа Саллаҳ янги президент ҳокимиятга чиқиш учун қон тўкилишини истамаётганлигини маълум қилган. Адама Барроунинг қасамёд маросими бугун ўтказилиши режалаштирилган эди. Айни пайтда Барроу қўшни Сенегалда яшамоқда. Дипломатлар Барроу қасамёдни Гамбиянинг Сенегалдаги элчихонасида амалга ошириши мумкинлигини маълум қилишган.

1 декабрда бўлиб ўтган сайловда ютқазган Яҳё Жаммиҳ сайлов натижасини тан олишдан бош тортган эди. Президент сешанба куни мамлакатда фавқулодда ҳолат тартибини эълон қилган. Кейинроқ Миллий Ассамблея Жаммиҳга ҳокимиятда яна 3 ой қолишига рухсат бергани ҳақида хабарлар тарқалган. Гамбия телевидениеси чоршанба куни Мавритания президенти Муҳаммад Абдулазиз Гамбияга ташриф буюргани ҳақида хабар берган.

Айни дамда Гамбия аҳолиси орасида уруш келиб чиқишидан хавотир ортиб бормоқда. Ҳозиргача 26 мингдан ортиқ гамбияликлар қўшни Сенегал ҳудудига қочиб ўтгани қайд этилган.