Гуардиан нашри хабар беришича, 2016 йилда Хитой иқтисодиёти ўсиши сўнгги 26 йилдаги энг паст кўрсаткични қайд этган.

Иқтисодий қудрати бўйича жаҳонда иккинчи ўринда турадиган Хитойда ўсиш суръати ўтган йили 6,7 фоизни ташкил этган. Мазкур маълумот жума куни Хитой ҳукумати томонидан эълон қилинган.

2015 йилда Хитой иқтисодиёти 6,9 фоизга ўсган эди. 2017 йилда иқтисодий ўсиш суръатлари янада секинлашиб, 6,5 фоизни ташкил этиши тахмин қилинмоқда. Бу эса 1990 йилдан бери энг паст кўрсаткич ҳисобланади.

Иқтисодий таҳлилчи Вей Яонинг маълум қилишича, Хитойнинг номолиявий қарзи ялпи ички маҳсулотга нисбатан 270 фоизга яқинлашган. 2015 йилда эса бу кўрсаткич ЯИМга нисбатан 250 фоизни ташкил қилган эди. Агар ҳукумат ЯИМни 6,5 фоиздан юқори даражада ушлаб турадиган бўлса, қарз миқдори ЯИМнинг 300 фоизигача етиши мумкин.

Таҳлилчилар АҚШдаги ҳокимият ўзгаришлари, Буюк Британиянинг Евроиттифоқдан чиқиши каби ўзгаришлар фонида жаҳон иқтисодиёти қандай ўзгаришларга юз тутиши мумкинлиги ҳақида аниқ фикр билдира олишмаяпти. Хитой ишлаб чиқариш ва экспорт ўртасидаги мутаносибликни орттиришга уринар экан, халқаро савдодаги пасайиш мамлакат иқтисодиётига кучли таъсир кўрсатиши мумкин.

Доналд Трампнинг глобаллашувга қарши қарашлари Хитой истиқодиётига зарар келтириши тахмин қилинмоқда. АҚШнинг янги президенти Хитойдан импорт қилинадиган маҳсулотларга юқори бож тарифлари жорий қилиш орқали иқтисодий уруш бошламоқчи.

“Bank of Amerika”​даги экспертлар фикрича, АҚШ-Хитой савдо муносабатларидаги зиддиятнинг кучайиши жаҳон иқтисодиёти учун энг катта бошоғриқ бўлиши мумкин.