Transparency International Халқаро нодавлат нотижорат ташкилоти  дунёнинг турли мамлакатларидаги коррупция даражасини акс эттирувчи рейтингини эълон қилди. 

Ташкилот давлатлардаги коррупция даражасини 100 баллик тизимда баҳолаган.

Аммо, бу йилги рейтингда ҳам ҳеч бир давлат юқори баллни тўплай олмаган. 2016 йилги рейтингнинг ўртача кўрсаткичи 43 баллни ташкил этган, рўйхатдаги 176 мамлакатнинг 2/3 қисмидан кўпроғининг тўплаган балли 50дан пастлиги таъкидланади. Бу эса, ушбу мамлакатларнинг давлат секторида коррупция даражаси юқори эканидан далолатдир, дея қайд этишган рейтинг тузувчилари. 

Ўзбекистонга 176 давлат ичида 156-ўрин берилган. Ўзбекистон Камбожа ва Конго Демократик Республикаси билан бир хил – 21 балл тўплаган. Ўтган йилги рўйхатда Ўзбекистоннинг балли 19 эди.

Рўйхатга 90 балл тўплаган Дания етакчилик қилмоқда. Илк бешликда Янги Зеландия (90 балл), Финляндия (89), Швеция (88) ва Швейцария (86) бор.

Энг қуйи бешликдан эса Яман (14 балл), Сурия (13), Шимолий Корея (12), Жанубий Судан (11) ва Сомали (10) ўрин олди.

Ҳисоботда қайд этилишича, энг ёмон кўрсаткичлар, ушбу мамлакатларда давлат институтларининг ишончсизлиги ҳамда ОАВнинг етарли даражада мустақил эмаслигини исботлайди. Шу ўринда, таъкидлаш ўринлики, сўнгги вақтларда, Ўзбекистонда коррупцияга барҳам бериш бўйича чоралар кўрила бошланди. Шунга биноан, ташкилотнинг кейинги рейтингларида, Ўзбекистон ўз позициясини сезиларли яхшилаб олишига умид қиламиз.