АҚШ президенти Дональд Трамп илк бор Оқ уйда юқори мартабали меҳмон — Буюк Британия бош вазири Тереза Мейни қабул қилди. Бу ҳақда Guardian хабар бермоқда.
Музокаралар давомида бир қатор масалалар, жумладан, савдо келишувлари, НАТО бўйича муносабатлар муҳокама қилинган. Музокаралар якунида АҚШ президенти Дональд Трамп Россияга нисбатан санкциялар масаласини ҳам кўтарган.
Трамп Россия президенти Владимир Путин билан бугун, 28 январь куни бўлиб ўтадиган телефон орқали мулоқотда кўтарилувчи мавзуларга аниқлик киритмаган. Бироқ, санкцияларни бекор қилиш ҳақида гапиришга ҳали эрталигини айтган.
«Россиядан санкцияларни олиб ташлаш ҳақида гапиришга эрта», — дея АҚШ президентидан иқтибос келтирмоқда Guardian.
Россия президенти билан муносабатлар ҳақида гапираркан, Трамп шундай деган: «Балки, бу муносабатлар яхши бўлмас».
Ўз навбатида, Буюк Британия бош вазири Тереза Мэй Россияга қарши санкциялар Минск келишувлари бажарилмагунга қадар амалда бўлишини талаб қилишини маълум қилди.