Сайтга келган хат-хабарларни ўқиб ўтиргандим. Ҳа, муаммоларни шу тахлитда ҳал этиб борилса, ҳадемай тугайди.

Шунда эшик тақиллаб икки сўз кириб келди. Афт-башараси... нима десам экан, ўрмонда ишлатавериб-ишлатавериб, пул бермай ҳайдаб юборилган гастарбайтерни кўрганмисиз? Ёки едирилиб нариги ёғи кўриниб қолган пойабзал тагчармини-чи? Борингки, клавиатуралари дув тўкилиб кетган, системний блоки ланг очиқ компютерни учратганмисиз? Бу сийқаси чиққан сўзлар ана шунга ўхшайди.

Аҳволларини кўриб раҳмим келди. Суриштирдим. Бири ЗАМОН ва бири ТАЛАБИ сўзлари экан. Туппа-тузук сўзлар. Ҳаттоки бирига “сизни ёшларнинг бирорта эстрада гуруҳига ё телеканалга ном сифатида берса ҳам бўлади”, деб кўнглини кўтардим.
– Биз шикоятга келдик.
– Нега?
– Бизни эртадан кечгача ишлатишади. Сийқамиз чиқиб кетди. Ҳурматимиздан ажралдик. Айниқса, расмий нашрларнинг дастидан бизга кун йўқ. Қўшга қўшиладиган қўшҳўкиздан фарқимиз қолмади. Порталга ёзмоқчимиз.

Дима Қаюм гапда ўтирганимизда “Йил қўрқитиши – парталга ёзаман” деганини эслаб, уларни тинчлантирдим. Аммо улар қўрқитмоқчи эмас, астойдил тайёргарлик кўриб келибди. Мана уларни қаерларда ишлатишганини ўзингиз кўриб чиқинг.
Огоҳлик – замон талаби
Ҳушёрлик – замон талаби
Чет тилларни ўрганиш – замон талаби
Hamisha ogoh bo'lish - zamon talabi!
МУҚОБИЛ ЭНЕРГИЯ – ЗАМОН ТАЛАБИ
Масофадан ўқитиш – замон талаби
ФЕРМЕР ХЎЖАЛИКЛАРИНИНГ МОДДИЙ-ТЕХНИК БАЗАСИНИ МУСТАҲКАМЛАШ – ЗАМОН ТАЛАБИ
Салоҳиятли мутахассис – замон талаби
Қимматли қоғозлар бозорини ривожлантириш – замон талаби
Qonun va adolat ustuvorligi – zamon talabi
ИҚТИСОДИЙ БИЛИМЛАРНИ ЎРГАНИШ – ЗАМОН ТАЛАБИ
Оилада болаларни ватанпарварлик руҳида тарбиялаш – замон талаби
Мустақил билим излаш – замон талаби
ХУСУСИЙ ТАДБИРКОРЛИКНИ ЖАДАЛ РИВОЖЛАНТИРИШ – ЗАМОН ТАЛАБИ
Ветеринария соҳасида юқори малакали кадрлар тайёрлаш – замон талаби
ТЕЗКОР ВА СИФАТЛИ ИШЛАШ – ЗАМОН ТАЛАБИ
Озиқ-овқат маҳсулотлари хавфсизлиги менежменти – замон талаби
HUQUQIY SAVODXONLIK – ZAMON TALABI
Ҳуқуқий тарғиботни кучайтириш – замон талаби
Телекоммуникация тармоқларини такомиллаштириш – замон талаби
Iste'molchilarga sifatli pochta aloqasi xizmatlari ko'rsatish – zamon talabi
Ҳуқуқий Маданият – Замон Талаби
Компьютер ва интернетдан фойдаланиш – замон талаби
ЁТ ҒОЯЛАР ВА ТАҲДИДЛАРГА ҚАРШИ КУРАШИШ – ЗАМОН ТАЛАБИ
ОГОҲЛИККА ДАЪВАТ – ЗАМОН ТАЛАБИ
Интенсив боғлар – замон талаби
Axborot texnologiyalaridan samarali foydalanish – zamon talabi
Чиқиндиларни оқилона бошқариш – замон талаби!
Ilmiy-tanqidiy matn yaratish – zamon talabi
ЯНГИЧА ТАФАККУР – ЗАМОН ТАЛАБИ
Уларни яна бир марта ишлатдим. Муаммоларингизни сайтда эълон қилиш – замон талаби.
Аммо эртага бошқа шоввозлар “Қишда печка қуриш, ёзда эса қурмаслик – замон талаби”, “Оч қолганда овқатланиш – замон талаби”, “Куёвчакка сарпо-суруғ – замон талаби”, “Россияда ишлаш – замон талаби”, “Замонни талаш – замон талаби”, “Такасалтанглик – замон талаби”, “Ижтимоий тармоқда ўлиб-тирилиш – замон талаби” сингари сарлавҳалар қўймаслигига кафолат йўқ-да. Нима дедингиз?

Манба: Hilol.uz

Алфраганус