Канада бош вазири Жастин Трюдо унинг мамлакати ҳар қандай диний эътиқоддаги қочоқларни кутиб олишга тайёрлигини маълум қилди. Бу ҳақда Reuters хабар бермоқда.
"Таъқиб, террор ва урушдан қочаётган ҳамма-ҳамма — диний эътиқодингиз қандай эканидан қатъий назар, канадаликлар барчангизни қучоқ очиб кутиб олади. Канадага хуш келибсиз!" - деди Жастин Трюдо.
Канада бош вазири Жастин Трюдо бошчилигидаги ҳукумат ҳозирча АҚШни танқид қилишдан тийилмоқда.Бироқ бир қатор сиёсатчилар Трампнинг тақиқловини қоралашган.
Трампнинг 27 январда имзолаган фармони 7 та мусулмон давлат: Эрон, Ироқ, Яман, Ливия, Сурия, Сомали ва Судан фуқароларига тегишлидир.
Аввалроқ АҚШ президенти суриялик насронийларга қочоқ мақомини олишда устунлик берилишини ҳам ваъда қилган эди.
АҚШ маъмуриятининг бу қарори АҚШ ва бошқа давлатларда кескин танқидга учраган.