7 та мусулмон мамлакат фуқароларига АҚШга кириш тақиқланиши бутун дунё бўйлаб норозиликларга сабаб бўлди. Бир қатор сиёсатчилар ва давлат арбоблари Доналд Трампнинг қарорини танқид қилиб баёнотлар эълон қилишди.

Суриялик қочқинларга энг кўп бошпана берган давлатлардан бири бўлмиш Германия канцлери Ангела Меркел «терорчиларга қарши кураш бундай чораларга баҳона бўла олмаслиги» ҳамда «муайян миллат ва эътиқодга мансублик туфайли кишиларни гумон остига олиш адолатдан бўлмаслиги»ни маълум қилган.

Ангела Меркел Трамп билан телефон суҳбатида Женева конвенциялари халқаро ҳамжамиятдан уруш қочқинларига инсонпарварлик ёрдами кўрсатилишини талаб қилишини эслатиб ўтган.

Франция ва Буюк Британия ташқи ишлар вазирлари ҳам Германия билан ҳамфикр эканлигини маълум қилишган. «Терроризмнинг миллати йўқ», – дейилади Франция ташқи ишлар вазири Жан-Марк Эронинг баёнотида.

Араб давлатлари лигаси ташкилоти АҚШ ҳукуматининг қароридан «чуқур хавотир» билдирган ва чекловларни «қабул қилиб бўлмайдиган чоралар» эканлигини эътироф қилган. Ироқ парламентининг айрим аъзоалри АҚШга жавобан худди шундай чекловлар жорий этишни таклиф қилишган. Ироқ шиаларининг таниқли уламоларидан Муқтадо ас-Садр америкаликларни Ироқдан чиқариб юбориш кераклигини айтган.

Эрон ҳукумати АҚШнинг қарорига худди шундай чеклов билан жавоб қайтарилишини эълон қилган. Якшанба куни Эрон ташқи ишлар вазири Муҳаммад Жавод Зариф Твиттердаги саҳифасида маълум қилишича, Эрон визасига эга бўлган америкаликлар учун янги чекловлар амал қилмайди.

АҚШ ҳукуматининг янги чеклови Судан ва Индонезия каби мусулмон давлатлар ҳукуматлари томонидан ҳам норозилик изҳори билан кутиб олинган. Италия, Дания, Швеция, Норвегия ва Канада ҳукуматлари ҳам Трампнинг хатти-ҳаракатини қоралашган. «Муайян мамлакатлар фуқароларини АҚШга киришига изн бермаслик қарори адолатдан эмас», – Дания бош вазирининг баёнотида. Канада бош вазири Жастин Трюдо ўз мамлакати қочқинларни қабул қилишга тайёрлигини маълум қилган.