Якшанба оқшомида Квебек шаҳридаги масжидга бостириб кириб, намозхонларга қарата ўқ узган террорчининг шахси аниқланди. Ҳужум оқибатида 6 киши ҳалок бўлган, 8 киши жароҳат олган. Яна 12 киши кичик жароҳатлар билан воқеа жойидан қочиб кетган. Бу ҳақида news.com.au​ нашри хабар бермоқда.

Террорчилик ҳужумини амалга оширишда айбланаётган Александр Биссонет 27 ёшда бўлиб, Квебекдаги Лавал университетида ижтимоий фанлар йўналиши бўйича ўқийди. Александр Биссонет болалигида ҳарбий мактабда таълим олган ҳамда ўзининг Фейсбукдаги саҳифасида антропология ва ижтимоий фанлар бўйича таҳсил олгани ҳақида маълумот жойлаштирган.

Квебек шаҳри яқинида яшовчи француззабон Биссонетнинг ижтимоий тармоқлардаги саҳифаларидан Франция президентлигига номзод – исломофобик қарашлари билан танилган, “Франция Трампи” номини олган Марин Ле Пеннинг тарафдори эканлиги англашилади. Марин Ле Пен Францияга муҳожирларни киритмасликни ваъда қилаётган сиёсатчилардан бири сифатида машҳур.

Биссонетнинг мактабдош дўстлари ва қўшнилари уни «ғалати», «камгап» ва «одамови» каби сифатлар билан эсга олишган. Уни танийдиганалар доим ўзининг эгизак укаси Метю билан бирга юриши, улар ҳеч қачон ажралмаслиги, бошқаларга кўп ҳам қўшилмаслиги ҳақида гапиришган.

Александрга университетда сиёсатшунослик фанидан дарс берган Жан-Мишел Аллард-Прус унинг сиёсий қарашлари маълумот бераркан, унинг бутунлай Доналд Трамп тарафдори бўлгани, иммиграцияга қарши эканлиги ва доимо Исроилни қўллаб-қувватлашини айтган. Унинг Трампга мухлис бўлганини университетдаги бошқа дўстлари ҳам тасдиқлашган. У муҳожирлар ва Трамп сиёсати ҳақида бошқалар билан кўпинча мунозарага боргани айтилган.

Биссонет Фейсбукда Доналд Трамп, Марин Ле Пен каби сиёсатчилар, шунингдек, Исроил мудофаа кучлари ҳамда айирмачи Квебек партияси ташкилоти саҳифаларини «ёқтирган». Фейсбукда у билан сиёсий мунозарага борганлардан бири Биссонетни «юқори даражада миллатчи ва ирқчи» деб таърифлаган.

Душанба куни Квебек шаҳридаги масжидда хуфтон намозини адо этаётган жамоатга қарши ўқ ёғдирган террорчи кеча илк суд мажлисига келтирилган. Унга нисбатан 6 кишини ўлдириш, яна 5 кишини ўлдиришга уриниш ҳамда тақиқланган қуролдан фойдаланиш каби айбловлар қўйилган. Навбатдаги суд мажлиди 21 февраль куни бўлиб ўтади.