Душанба куни Қатар авиакомпаниясига қарашли йўловчи самолёти тўхтамасдан учиш бўйича энг узоқ рейсни амалга оширди, дея хабар бермоқда Guardian нашри.
Самолёт Қатар пойтахти Доҳа шаҳридан Янги Зеландиянинг Окланд шаҳригача бўлган 14 535 километрлик масофада парвоз қилган. QR920 рейси билан Доҳадан учган ҳаво лайнери душанба куни маҳаллий вақт билан тонгги 7:25 да (Тошкент вақти билан якшанба куни тунги 23:25) Окланд аэропортига қўнган.
Боинг 777 самолёти ўз парвози давомида 10та вақт минтақасини кесиб ўтган. Самолётни 4 нафар учувчи бошқаргани хабар қилинган. Парвозни амалга ошириш учун 16 соат 23 дақиқа сарфлангани айтилмоқда.
Ўтган йилнинг мартида Emirates компанияси Дубайдан Окландга амалга оширган 14 200 километрлик тўхтовсиз парвоз энг узун рейс сифатида қайд этилган эди. Учиш масофаси бўйича Ҳиндистон авиакомпаниясининг Деҳли-Сан-Франциско рейси энг узун тўхтовсиз парвоз ҳисобланади. Аммо ер юзаси бўйича ҳисобланганда Доҳа ва Окленд орасидаги масофа Деҳли ва Сан-Франциско орасидаги масофадан узоқроқ бўлади.