АҚШга киритилмагани учун бошпана излаб Канадага бораётган муҳожирлар сони ортиб бормоқда, деб ёзади Guardian​ нашри.

Ўтган ҳафтанинг дам олиш кунларида 70 нафар қочқин Канадада ҳибсга олинган. Улардан аксарияти Доналд Трампнинг фармони туфайли АҚШдан бошпана ололмасдан Канада чегарасини кесиб ўтган мусулмонлардир.

Канада чегара хизмати маълумотларига кўра, АҚШ билан чегарадош Манитоба округида 21 нафар, Квебекда эса 46 нафар муҳожир қўлга олинган. 2004 йилда Канада ва АҚШ ўртасида имзоланган келишувга мувофиқ, муҳожирлар қайси мамлакатга биринчи етиб келишса, ўша ердан бошпана олишлари лозим.

Шартномага кўра, АҚШ орқали Канадага келган муҳожирларга бошпана берилмайди ва улар ортга қайтарилишлари мумкин. Ҳуқуқ ҳимоячилари Канада ҳукуматини келишувга амал қилмасликка чақирилмоқда. «АҚШ барча муҳожирлар учун хавфсиз жой эмас. Вазият олдин ёмон эди, аммо энди янада ёмонлашди. Уларга қандай муносабат кўрсатилиши номаълумлигича қолмоқда. Келишув бекор қилиниши учун бор кучимни ишга соламан», – деб айтган Канада муҳожирлар кенгаши раҳбари Жанет Денч.

Ҳибсга олинганлар бошпана олишлари учун зарур ҳужжатларни тақдим этишлари лозим бўлади. Канада қонунчилигига кўра, қўлга олинган муҳожирлар 48 соатдан 30 кунгача ҳибсда сақланиши мумкин. Агар қочқинларни АҚШга жўнатиб юборилса, Доналд Трампнинг фармонига мувофиқ, у ердан ўз ватанларига қайтиб кетишларига тўғри келади.