Бирлашган Миллатлар Ташкилоти бош котиби Антонио Гутерреш ташкилотнинг Ливиядаги янги вакиллиги учун кўрсатган номзоди АҚШ томонидан тан олинмагани учун «таассуф»да эканлигини маълум қилди, дея хабар бермоқда Al Jazeera​ телеканали.

Душанба куни Гутерреш БМТнинг Ливиядаги вакили этиб Фаластиннинг собиқ бош вазири Салом Файёдни тайинлашни таклиф қилган эди. Фаластинлик сиёсатчи БМТ бош котиби томонидан мазкур вазифа учун «энг муносиб номзод» дея таърифланган ва собиқ бош вазирнинг коррупсияга қарши курашдаги хизматларини олқишлаган.

Бош котибнинг номзоди чоршанба куни Хавфсизлик Кенгашида тасдиқдан ўтиши лозим эди. Бироқ АҚШнинг БМТдаги элчиси Никки Ҳейли томонидан вето қўйилган. «Мазкур қаршилик учун қаттиқ афсусдаман. Бунинг учун бирор сабаб кўрмаяпман. Бу Ливияда тинчлик ўрнатиш жараёни ва Ливия халқи учун катта йўқотиш бўлди», дея ўз фикрини баён қилган жаноб Гутерреш. Унинг фикрича, БМТ барча давлатлар учун бирдек бетараф ишлаши лозим.

Ҳудудий низолар давом этаётган мамлакатларга БМТ вакили номзоди Хавфсизлик Кенгашидаги барча 15 мамлакат томонидан тасдиқланиши лозим. АҚШ томонидан вето ҳуқуқидан фойдаланилиши туфайли Салом Файёд Ливияда ишламайдиган бўлди. Жаноб Файёд мутахассислигига кўра иқтисодчи бўлиб, узоқ йиллар Жаҳон банки ва Халқаро валюта жамғармасида ишлаган. 2002 2005 йилларда Фаластин молия вазири, 2007 2013 йилларда бош вазир лавозимларида ишлаган.